Kudutyulwe kwabulawa indoda yaseMonti eneminyaka engamashumi amahlanu anesithathu (53) ubudala ngethuba kuhlaselwa ikhaya eBraelyn ngentseni yangoMgqibelo umhla weshumi elinesibhozo (18) kuCanzibe.
Isithethi samapolisa uColonel Priscilla Naidu uthi ingqina lithi belibukele umabonakude ngethuba lisiva isithuthi simisa phandle emva nje kobusuku. Uthi emva kwemizuzu embalwa, umntu uye wavula ifestile yegumbi lokuphumla.
Uthe xa ephakama esiya kukroba uye wabona ingalo yomrhanelwa isusa umkhusane. Utyhola ngelokuba umrhanelwa ebexhobile.
UColonel Naidu uthi ingqina lalanda umhlakulo labetha umrhanelwa ngethuba limkhwaza. Uthi ixhoba elineminyaka engamashumi amahlanu anesithathu (53) ubudala livuswe sesi siphithiphithi laza laya kukroba ngethuba umrhanelwa elidubule kumzimba ongentla phambi kokuba abaleke.
Le ndoda ibhubhele kwindawo yexhwayelo. Amapolisa aseCambridge aphanda ityala lokubulala.