Igwetywe ubomi indoda eyaqweqwedisa idlwengula umtwana(13) kuCentane

Inkundla kamantyi yengingqi yakuCentane igwebe indoda egama linguMelisizwe Mtshatsheni, noneminyaka engamashumi amathathu(30) ubudala, isigwebo sobomi ethothoza ejele ngokudlwengula intwazana eneminyaka elishumi elinesithathu(13) ubudala.

Umtyholwa ugwetywe ngoLwesithathu, umhla wama-27 kweyeKhala ku2022. Izityholo kukuba umtyholwa waya kwikhaya lexhoba ngoLwesihlanu we16 kuTshazimpuzi 2021 ekhangela udade wexhoba kodwa akamfumana. Uye wacela ixhoba ukuba limkhaphe ukuya kukhangela usisi apho ahlala khona kunye nesoka lakhe. Ekumkhangeleni udade wexhoba, akafumaneka. Umtyholwa waye wacebisa ukuba baye kowabo kwilali yaseQoboqobo, kuCentane. Ekufikeni kwabo kumzi womtyholwa wavala ucango wamdlwengula.

Ukuzinikela nophando olugqwesileyo lwabacuphi nguDetective Sgt Maxhoba Mrhasi wecandelo elijongene nobuNdlobongela kusapho, ukukhuselwa kwabantwana kwanezokwabelana ngesondo eGcuwa, umtyholwa ufunyenwe enetyala lokudlwengula waze wagwetyelwa ubomi entolongweni. Ibambela lomkomishinala wesithili saseAmathole uBrigadiya Ngangema Xakavu usamkele isigwebo sobomi kweli tyendyana leminyaka engamashumi amathathu ubudala kwaye uncome iGosa loPhando ngomsebenzi oncomekayo. Unethemba lokuba esi sigwebo siza kuthumela umyalezo oqatha kubo bonke abo baxhaphaza amakhosikazi nabantwana baza kujongana nomthetho.