Amagosa eeNkonzo zoLuleko ahluthe intlaninge yezinto ezingekho mthethweni nezingafunwayo kwintolongo yaseJohannesburg, neyaziwa njengeSun City.
Oonogada bentolongo bekhatshwa ngamalungu eenkonzo zamaPolisa oMzantsi Afrika benze ugqogqo kule ntolongo ngobusuku bangoLwesithathu.
Iiselfowuni, iirutha zeWifi, iiPlayStation kunye nentsango zezinye zezinto ezithe zafunyanwa.
UMkomishinala weeNkonzo zoLuleko kuzwelonke, uMakgothi Thobakgale uthi, “Silapha njengenxalenye yenkqubo yococeko ebesiyibambe kwezi nyanga zintathu zidlulileyo kumaziko ahlukeneyo oluleko. Ezi zizixhobo zoluleko esizichongileyo ngokusekelwe kulwazi esiye sakwazi ukuluqinisekisa. Ngokwenene, sikhangela izinto ezingekho mthethweni. Izinto ezingavumelekanga kwiziko loluleko, ngakumbi eziseleni.”