Amapolisa eMpuma Koloni abambe indoda enamashumi amabini anesihlanu (25) eminyaka ubudala ngezityholo zokubulala utatomkhulu wayo kuKomani.
Isithethi samapolisa uKapteni Namhla Mdleleni uthi ngokweenkcukacha, kutyholwa ukuba uluntu lwazise amapolisa malunga nokubulawa kwabantu kwisitalato iSizani, eMlungisi ngoLwesihlanu umhla wamashumi amathathu (30) kweyeThupha.
Ekufikeni kwabo kwindawo yexhwayelo, amapolisa afumana ixhego elineminyaka engamashumi asithoba (90) lihleli esitulweni ligqunywe ngengubo. Lihlatywe emqaleni.
UMdleleni uthi umzukulwana wexhoba uye wangeniswa kwisikhululo samapolisa ukuyoxhentsiswa ngemibuzo ze emva kophando oluthe kratya, amapolisa afumanisa ukuba umrhanelwa nguye owabulala utatomkhulu wakhe.
Umrhanelwa kulindeleke ukuba avele kwinkundla kamantyi wakuKomani ngoMvulo umhla wesibini (2) lweyoMsintsi.