Amapolisa aseMpuma Koloni azila ukusweleka kwegosa elibhubhe kwingozi yemozulu embi eNelson Mandela Bay ngobusuku bangoMgqibelo umhla wokuqala (01) eyeSilimela 2024.
Isithethi samapolisa uColonel Priscilla Naidu, uchaze eli polisa njengoConstable Elroy May obeneminyaka engamashumi amathathu anesithoba (39) ubudala. Wayelilungu lecandelo elichasene nemigulukudu.
UNaidu uthe uMay ebekhwele kwimoto yamapolisa eye yantlitheka kwindlela iR75 kwindlela iDespatch ngorhatya. Ukwathe ngokobungqina, umqhubi wesithuthi sikarhulumente uphulukene nolawulo saze saqengqeleka eludongeni emva koko sawela phezu kophahla lwaso.
UConstable May ubhubhele kwindawo yexhwayelo. Ityala lokubulala ngokungenanjongo livuliwe ukuze kuphandwe.
By Anita Qubula.