By Siphiwo Boqwana.
IQela leBhola eKhatywayo leSizwe lamaGqala oMzantsi Afrika liphumelele itumente iClash of Legends ebibanjelwe eBotswana ngamazwe amane (4). Amaqela ebethabatha inxaxheba kuletumente ngabahlinzeki iBotswana kumabala iObed Itani Chiluma kwidolophu iFrancistown, iNamibia, iZimbabwe noMzantsi Afrika. Le tumente ibidlalwa ngoMgqibelo umhla wamashumi amabini ananye (21) kulenyanga yeSilimela kumabala iObed Itani Chiluma, kwidolophu iFrancistown.
UMzantsi Afrika ubethe iZimbabwe kumdlalo wokuqala wamandulela kamagqibela kankqoyi, yaze yona iBotswana yatywatyusha iNamibia.
Kumagqibela kankqoyi iqela leli lamagqala ebhola ekhatywayo abhaxabule abahlinzeki iBotswana ngamanqaku amane kwelinye (4-1). Amanqaku oMzantsi afakwe nguCyril Nzama, uKatlego Mashego wafaka amabini noSimpiwe Tshabalala wabhalisa ngelakhe inqaku.
Iqela lamagqala oMzantsi Afrika ebhola ekhatywayo belibotshwe ngoluhlobo, unozinti ibingu Itumeleng Khune, ngasemva ibinguCyril Nzama, uDerrick Spencer, uLucky Lekgwathi noHappy Jele.
Esiswini ibi nguReinelwe Letsholonyane, uSimphiwe Tshabalala, uKatlego Mashego, uDikgang Mabalane noThuso Phala.
Phambili kwiifolosi zamagqala oMzantsi Afrika bekudlala uJosta Dladla noSiyabonga Nomvethe.
By Siphiwo Boqwana