USekela Mphathiswa wezeMpilo, uGqirha Sibongiseni Dhlomo, uchonge inkqubo yezempilo yesithili njengesixhobo apho ukhathalelo lwempilo olusisiseko lunokuphuculwa ukuze lufikelele kukhuseleko lwezempilo jikelele (UHC) ngo-2030.
Ube sesinye sezithethi zembeko ngexesha lenkomfa yeentsuku ezimbini yokuvavanya inkqubela yoMzantsi Afrika ekunikezeleni ngeenkonzo eziphuculiweyo zokhathalelo lwempilo ethe yaqukunjelwa eMonti ngoLwesine.
Ugxininise ukuba isiseko senkqubo yokunakekelwa kwempilo iya kudlala indima ebalulekileyo ekufezekiseni iinjongo zeSikimu se-Inshurensi yezeMpilo yeSizwe.
“Ukomeleza inkqubo yezempilo kufuneka siphucule iziseko zophuhliso, siphucule ukugcinwa koshicilelo kwi-elektroniki, ulawulo olungcono lwemali kunye nabasebenzi.” Nangona kunjalo, uGqr Dhlomo ukwabethelele ingongoma yokuba abemi nabo kufuneka bathathe amanyathelo ngempilo yabo.
Ngeli xesha, isithethi seSebe kuzwelonke, uFoster Mohale, uthe inkqubo yokhathalelo lwempilo yeyona ndlela ibandakanyayo, enobulungisa, engabiziyo, nesebenzayo efikelelekayo malunga ne-86% yabemi baseMzantsi Afrika.
“Kubalulekile ukuba sivavanye inkqubela esiyenzileyo kwaye senze iingcebiso malunga nokuba singazisa njani na iinkonzo eziphucukileyo eluntwini,” utshilo.
Iintetho ezahlukeneyo ezinikwe abathunywa abangama-350, kuquka nabameli boMbutho wezeMpilo weHlabathi, bagxininisa ukubaluleka kwecandelo lezempilo likarhulumente ekusebenzisaneni noogqirha babucala ukuze bafezekise iinjongo zokhathalelo lwempilo jikelele kunye ne-NHI ngowama-2030.
Abasebenzi bezempilo bemveli kunye namalungu ecandelo labucala babongozwa ukuba bathobele imimiselo ebekiweyo kwaye basebenzisane necandelo likarhulumente ngeenjongo zophando ukulinganisa inkqubela ye-PHC yelizwe.
Inkomfa yaqukunjelwa ngabasebenzi bezempilo beqinisekisa ukuzinikela kwabo ekufikeleleni kwinjongo yokhathalelo lwempilo jikelele kunye nokuqaphela ilungelo labo bonke abantu lokufikelela kwiinkonzo zempilo ezisemgangathweni.