Indoda eneminyaka engamashumi amathathu (30) ubudala yaseGqeberha ejongene netyala lokubulala uyise isilahlile isicelo sayo sebheyile.
Urhulumente utyhola ukuba uJuan Kolesky usemva kokubulawa kukayise, uAnton, owadutyulwa wabulawa kwikhaya lakhe eRowallan Park ngo-Agasti ka-2020.
UAnton, owayeneminyaka engamashumi amahlanu (-50) ubudala ngelo xesha, wadutyulwa wabulawa engaphakathi kwindlu yakhe ekwisitalato iRademeyer waza wafela kwindawo yexhwayelo.
U-Kolesky wabanjwa malunga nokubulala ngoJuni ngelixa eseluvalelweni ngetyala elingahambelaniyo lokuphanga.
NgoMvulo igqwetha lakhe, uPaul Roelofse wazise inkundla ukuba uKolesky ukhethe ukusiyeka isicelo sakhe sebheyile, okwangoku.
U-Roelofse uthe umxhasi wakhe uya kwenza isicelo sebheyile kamva, akuba efumene ithuba lokufunda ubungqina obuthile kunye namaxwebhu.
IGqwetha loMbuso uLiezel Landman uthe umba sele ulungile kwaye ukulungele ukugqithiselwa kwiNkundla ePhakamileyo.
“Kufuneka sigqibezele isicelo sebheyile,” utshilo.
NgoLwesithathu weveki ephelileyo, uKolesky wanikwa ibheyile ye-R10 000 malunga nesityholo sokuphanga indlu, kodwa useseluvalelweni ngenxa yetyala lokubulala elingekapheli.
Uphango lwendlu kutyholwa ukuba lwenziwa kwindawo encinci yaseGreenbushes ngomhla weshumi elinesixhenxe (-17) kuJuni.
Abo atyholwa nabo kwityala lokubulala nguDellon Makoppa, oneminyaka engamashumi amathathu anesixhenxe (37), Kurt Bosman, oneminyaka engamashumi amathathu (30), noBernard Kopper, oneminyaka engamashumi amathathu anesithathu (33).
Ngenxa yokuba bebevele enkundleni malunga nokubulawa kuka-Anton phambi kokuba kubanjwe unyana wakhe, ityala labo lihlehliselwe umhla wamashumi amathathu (30) kaJulayi.
UKolesky uzakuvela kwakhona enkundleni ngomhla weshumi elinesithathu (13) ku-Agasti.