Kulindeleke abanye abadlali abatsha kwiRichards Bay.
Omnye wabadlali nobesanda kukhululwa yiManelodi Sundowns nabanye abadlali ngexesha uRulani Mokwena esekweliqela ufumene umsebenzi kwelinye lamaqela aseThekwini.
UThabiso Kutumelo nothe wakhululwa kwiSundowns ngulowo wayesakuba ngumqeqeshi weliqela uRulani, wamkelwe yiRichards Bay njengomdlali omtsha weliqela lebhola ekhatywayo laseMdubana.
Lo mdlali uneminyaka engamashumi amathathu nanye (31) ubudala wakhululwa nabanye abadlali kwiSundowns abafana noBongani Zungu, uBrian Onyango noGuston Sirino kwiveki egqithileyo. UKutumelo ngumdlali waphambili, kwisizini egqithileyo ebekwimboleko kwiqela leCape Town City eKapa nalapho efake amanqaku amathathu (3) kuphela isizini yonke, wancedisa ekufakweni kwenqaku elinye (1) kwimidlalo engamashumi amabini anesibhozo (28) ayidlalileyo.
UKutumelo ebesakudlalela iBaroka FC, ebekhe wafunwa luSuthu olumabhesha phambi kokuba alishiye eliqela leSundowns okanye akhululwe. UThabiso Kutumelo sele evela kudlalela iMaritzburg United ukusuka ngonyaka ka2019 ukuya kunyaka ka2021.
Abanye abadlali abatyikitywe ziiNatal Rich Boys nguSabani Khumalo noFezile Gcaba abasuka kwiqela elikwiligi iABC Motsepe KwaZulu Natal iMkhubane Classic.
Abanye abatyikityiweyo ngumdlali osuka kwiChiefs nochithe iisizini ezimbini (2) kuyo esuka kuMazulu ngonyaka ka2022. Batyikitye noTlakusani Mthethwa kwiqela leSwallows emva kokuba eliqela lithengiselwe iMarumo Gallants noKeegan Allan nobekwiSupersport United. Abanye abadlali bazakubhengezwa kungenjalo batyikitywe leliqela kungentsuku zatywala.
By Siphiwo Boqwana.