Iqela lebhola yomboxo loMzantsi Afrika iiSharks kuphela kweqela elishiyekileyo kwindebe ye-Challenge.
Iqela ekuphela kwalo kwindebe yeChallenge, iiSharks, zidityaniswe neqela iClermont kumdlalo ozakudlalelwa kwibala iKingsholm eLondon, lemidlalo yamandulela kamagqibela kankqoyi izakuqhuba kwimpelaveki yangomhla wesithathi (3), nowesine (4) kwakunye nowesihlanu(5) kwinyanga kaCanzibe, 2024.
I-‘European Professional Club Rugby’ (EPCR) yabhengeza kwangethuba ukuba amaqela oMzantsi Afrika azakukwazi ukuhlinzeka kweli loMzantsi de ibe luluhlu lamaqela asibhozo kodwa ukuqala kumandulela kamagqibela kankqoyi kuzakufuneka edlalele ngaphandle kwelilizwe.
Kulindeleke ukuba iqela loMzantsi, iiSharks, zihlinzeke eli qela leClermont kwelaseNgilane nangona bengabahlinzeki kunjalo nje bengengoba seNgilane. Nayo iClermont izakube ingadlaleli kowayo njengokuba bengabaseFrance.
Omnye umdlalo wamandulela kumagqibela kankqoyi uzakuba phakathi kweqela iGloucester neqela iBenetton nabazakuthi badlalele eTwickenham Stoop kwelaseNgilane.
Imidlalo yamaqela asibhozo ibidlalwa kwimpelaveki esiphuma kuyo ngolwesihlanu umhla weshumi elinesibini (12) nalapho iGlaucester ibe liqela lokuqala ukuzibekela indawo kumaqela amane ashiyekileyo nalapho ithe yabetha iOspreys ngamanqaku angamashumi amabini anesithathu kwishumi elinesithathu (23-13).
Ngomgqibelo umhla weshumi elinesithathu (13) kulenyanga imiyo iiSharks zizibethele iEdinburg ngamanqaku angamashumi amathathu anesithandathu kumanqaku angamashumi amathathu (36-30).
Ngecawa umhla weshumi elinesine (14) kule imiyo inyanga iClermont ibhaxabule iUlster ngamanqaku angamashumi amahlanu anesithathu kwishumi elinesine (53-14).