Iqela laMakhosi, i-Kaizerh Chiefs liphinde lafumana isibhaxu ngethuba ibethwa kabuhlungu yi-Chippa United ngamanqaku amabini kwimband’ esikhova kumdlalo obubanjelwe eMonti kumabala i-Buffalo City.
Omnye umdlalo ubunika umdla ngumdlalo webhakabhaka ezikamagebhula nezithe zawugebhula umhlaba kamasipalati kwesikamabinzela isigodi e-Soweto kumabala i-Orlando apho ithe yabhaxabula inqunqela egoqweni ikwangcwaba abafana besithende i-Golden Arrows ngempama eyongezwe ngoocikicane ababini ukutsho oko ngamanqaku asixhenxe kwelinye (7) nelokubika ekhaya emnambithi (1).
Ezinye iziphumo sibone i-Supersport United ebethelwa ekhaya ngelinye eqandeni (1-0) ngabandwendweli i-TS Galaxy, kanti yona i-Richards Bay ibethe iMoroka Swallows ngelinye kwimbande yesikhova (1-0).
Stellenbosch babambene ngeqanda macala phantsi kwentaba yetafile entshona koloni ngethuba behlinzeke i-Sekhukhune United.
I-Royal AM izibethele iPolokwane City ngamanqaku amathathu kwamabini (3-1), kwelinye icala Amazulu alibethele kowayo iqela le-Cape Town City ngelinye inqaku eqandeni (1-0) eKapa.
Yona iMamelodi Sundowns khange idlale kwiDSTV Premiership kuba ibidlala kwi-CAF, apho ithe yabambana ngeqanda macala ne-Young Africans zaseTanzania. Kodwa ke i-Sundowns iye yaphumelela ngamanqaku amathathu kwamabini ngethuba kukhatywa iipenalti ngexesha elongezelweyo, apho unozinti uRonwen Williams aye waliqhawe khona.
Bekulindeleke ukuba i-Sundowns iqubisane ne-Cape Town Spurs eKapa ngolwesibini umhla wethoba (09) ngecala emva kwentsimbi yesixhenxe (19:30) ngokuhlwa kumdlalo weDSTV Premiership.
By: Siphiwo Boqwana