Abarhanelwa, abakhutshwe kwividiyo bewangazelisa oocelemba kunye nemipu, bajongene nezityholo ezininzi.
Amapolisa abambe abantu abane kulandela izenzo zokugrogrisa nobundlobongela kwisikolo samabanga aphantsi eKatlehong.
Kwividiyo ethe yasasazeka, amadoda aphethe imipu noocelemba abonwa esoyikisa kwaye ehlukumeza abafundi nootitshala.
Esi sine sibanjwe phezolo kwaye bazakuvela kwinkundla yasePalm Ridge ekuhambeni kwexesha. Bajongene namatyala ohlukeneyo aquka ukubetha, ukuphatha umpu ngokungenankathalo kwa nokubeka ubomi babantu emngciphekweni, ukunikezela ngeenkonzo zokhuseleko ngelixa ungabhaliswanga, kunye nokoyikisa.
Umpu wokoyikisa kunye noocelemba baye bathathwa ngamapolisa. Omnye wabarhanelwa ubanjelwe ukubetha uMphathi wesiKhululo kwisikhululo samapolisa saseKatlehong North xa iqela labantu belifuna ukujongana noMfundisi wendawo ngaphandle kwesikhululo samapolisa.
Oku kulandela isiganeko apho uMfundisi wale ndawo, oonogada bakhe nabanye bagaleleke kwisikolo samabanga aphantsi iMatshidiso izolo bethatha ngenkani abantwana ababini abasebancinci.
UMkomishinala wePhondo laseRhawutini uLieutenant General Tommy Mthombeni uthi kukho ithuba lokuba amapolisa abambe abantu abaninzi njengoko uphando lusaqhubeka .