Amapolisa ephondo leMpuma Koloni athi inkcuphelo ikhokelele ekubanjweni komnini weteksi waseMonti oneminyaka engamashumi amahlanu anesine (54) ubudala ngenxa yokuba nompu ongenampepha neembumbulu kwakunye namabhanti eyunifomu yamapolisa.
ULieutenant-Colonel Siphokazi Mawisa uthe amalungu eTactical Response Team aphumeze isigunyaziso sokugqogqa kwisakhiwo esikwilokishi yaseMzamomhle eGonubie emva kwemini ngoLwesine umhla wokuqala (1) kweyeThupha.
Oku kulandela isilumkiso sokuba umrhanelwa uphethe umpu ongenampepha kwaneziyobisi.
Uthe amalungu eTRT agqogqa le ndawo ethatha izinto ezohlukeneyo kuquka nompu owawungena nenombolo (serial number).
UColone Mawisa uthe umnini teksi ujongene nelinye ityala lokusilela ukukhusela owakhe umpu kunye neembumbulu ezithinjiweyo.
Uthe le ndoda iza kuvela enkundleni kungekudala kwiNkundla kaMantyi yaseMonti