Amapolisa aphanda amatyala okubulala nelokuzama ukubulala, emva kwesiganeko sokudubula esithe sasuba imiphefumlo emibini (2) sashiya inkosikazi enye (1) yenzakele kwithaveni edumileyo ebizwa ngokuba yiShampiez, eMdantsane ngobusuku bangoMvulo umhla wesithandathu (06) kuCanzibe 2024.
Kutyholwa ukuba ngezithuba zentsimbi yeshumi ukuya kwishumi elinanye ebusuku, igquba labahlobo belihleli ngaphandle kwethaveni kwaNU-9 ngethuba oonqevu ebebehamba ngeemoto ezimbini bedubula kweli qela.
Ngokwesithethi samapolisa aseMonti uWarrant Officer Majola Nkohli, uthi la maxhoba mabini akwiminyaka yamashumi amathathu ubudala afumene amanxeba eembumbulu kwaye abhengezwa njengaswelekele kwindawo yexhwayelo.
UNkohli uthi ixhoba lesithathu elingowasetyhini lichanwe ngembumbulu laze lasiwa esibhedlele.
“Abarhanelwa basagcwele amathafa,” utshilo.
Abantu abanolwazi olunokukhokelela ekubanjweni kwabarhanelwa bayabongozwa ukuba baqhagamshelane nesikhululo samapolisa esikufutshane.