Ziphinde zawabamba ngogovana Amakhosi iRockets ngethuba lameqela ebambana ngamanqaku amabini macala (2-2) ngoLwesithathu umhla wesibhozo kuCanzibe kwibala iPeter Mokaba ePolokwana.
IRokets zibuye amatyeli amabini zikhokelwa ngenqaku ngabafana bokuthula noxolo. Lo mdlalo weKaizer Chiefs neTS Galaxy ubutaka iintlantsi ngethuba lamaqela efaka amanqaku amane besonwabisa abalandeli.
Umdlali wangasemva weChiefs uEdmilson Dove waseMozambique uphinde wafumana ikhadi elibomvu kwakhona ngethuba ephisa ngepenalthi kwiqela leRockets ngethuba zilinganisa amanqaku ngelinye macala (1-1).
IChiefs ibizimisele ukuwuphumelela lomdlalo ingakumbi emva kohlazo abalifumene ngethuba bebhuqwa liqela leSundowns ngamanqaku amahlanu kwelinye (5-1). Kungoku nje Amakhosi awakakwazi ukulibetha ncam iqela iTS Galaxy emva kwemidlalo esixhenxe bedibana oko lathi lonyuselwa eliqela.
Eminye imidlalo ebidlalwa ngoLwesithathu iSundowns idlale ntanganye neGolden Arrows ngeqanda macala (0-0) ekuhambeni eThekwini, kanti sona iStellenbosch siye satsho phantsi isitya sigcwele kuMazulu kowaso eKapa ngethuba zibambana ngeqanda macala (0-0), kanti yona iOrlando Pirates isaqhuba kakuhle ngokufaka uxinezelelo olumandla kwiStellies ifuna landawo ikuyo yesibini emva kokuzenzela kwiChippa United ngokuyibetha ngamanqaku amabini eqandeni (2-0).
UTshegofatsa Mabasa ufake inqaku kulomdlalo wabo neChili Boys nto leyo imthatha imbeke kwindawo yokuqala kwabagaqele ukuphumelela indebe iLesly Manyathela Golden Boot ebetha ngenqaku elinye ebekulendawo uIqraam Rayners weStellies.
UMabasa ngoku unamanqaku alishumi elinesihlanu. Kwelinye icala ngoku iPirates ishiywa siStellies ngenqaku kuphela kwindawo yesibini.
iPirates ihleli kwindawo yesithathu kuluhlu lamaqela ePSL ibe inamanqaku angamashumi amane anethoba. IStellenbosch sihleli kwindawo yesibini ngamanqaku angamashumi amahlanu. La maqela mabini iStellenbosch nePirates zifuna ukuzibekela indawo kwiCAF Champions ligi.
By Siphiwo Boqwana