By Esona Magawana.
Amadoda asibhozo alindeleke ukuba avele kwinkundla kamantyi yakuQumbu ngoLwesine, umhla weshumi elinesixhenxe (17) kweyeKhala 2025, emva kokuba ebanjwe eqhuba isithuthi sesebe lezempilo esiqweqwediswe eDutywa kwiveki ephelileyo.
Isithethi samapolisa uKapteni Welile Matyolo uthi amapolisa akuQumbu abone imoto yohlobo lweveni engabhaliswanga yohlobo lweToyota ngoLwesibini, atsalela umqhubi kwindlela yegrabile yaseBalasi.
Uthi la madoda aye agqogqwa aza amabini afunyanwa enemipu engenampepha-mvume eneenombolo ezibhalwe phantsi, kwakunye neembumbulu ezilishumi elinesithoba.
Uphando lokuqala ludize ukuba abarhanelwa bebekwiphulo lokubiwa kwemfuyo nanjengoko bebekhokele amapolisa eNxothwe, nalapho kuthe kwafunyanwa iigusha ezingamashumi amane anesibini ezibiwe kuQumbu, kwaze kwabanjwa abanye abarhanelwa abane.
La madoda asibhozo aneminyaka ephakathi kwamashumi amabini anesithathu (23) ukuya kumashumi amane anesibhozo (28) ubudala, azakujongana nezityholo zokuba nemoto eqweqwedisiweyo, imipu engenampepha-mvume kwakunye nokuba neegusha ekurhaneleka ukuba zibiwe.