By Siphiwe Boqwana.
Amaqela amabini aseSoweto i-Pirates ne-Chiefs ziza kule midlalo neChippa neMagesi bengxwelerhekile namhlanje, emva kokufumana izibhaxu kwimpelaveki esiphuma kuyo.
Kumdlalo we-Betway Premier League namhlanje umhla wesine (04) kweyoKwindla nalapho kuqubisana iKaizer Chiefs neMagesi FC kumabala iFNB eRhawutini, kukho abadlali ababini (2) be-Chiefs abangazokwazi ukuba khona ngenxa yokunqunyanyiswa imidlalo emibini umdlali ngamnye. UGaston Sirino ngomnye wabadlali abangekhoyo kulo mdlalo emva kokufumana ikhadi elibomvu ngethuba bequbisene neSupersport United nalapho batywatyushwa ngamanqaku amane kwelinye (4-1).
Omnye umdlali ongazukwazi ukuthabatha inxaxheba kulo mdlalo nguThabo Cele yena ufumene amakhadi amthubi amane (4) kwimidlalo eyohlukeneyo, wafumana lamakhadi kwiqela laMazulu ne-Stellies, kumdlalo weNedbank neChippa United, elesine ulifumene ngoMgqibelo umhla wokuqala (01) kule yoKwindla inyanga ngethuba bebethwa yiMamelodi Sundowns ngenqaku elinye kwiqanda (1-0).
Nakweminye imidlalo kukho abadlali abangazo kubakho kumaqela abo ukuqala kwimidlalo yanamhlanje nangomso.
Unozinti weOrlando Pirates uSipho Chaine akakwazi ukuba khona kulo mdlalo wanamhlanje nozakube ubanjelwe kumabala iNelson Mandela Bay eGqeberha namhlanje umhla wesine (04) kulenyanga yoKwindla ngecala emva kwentsimbi yesixhenxe (19h30).
Abanye abadlali abangazokudlala kulemidlalo yeBetway Premier League nguRiaan Hanamub noRichard Ofori baMazulu, Daniel Msendani weMarumo Gallants, uThabo Moloisane no-Andry de Jong be-Stellenbosch FC, umqeqeshi we-Supersport United uGavin Hunt, uKhululani Ndamane no-Victor Letsoalo be-TS Galaxy.