YENZE IMBALI ISPAIN KWIBHOLA EKHATYWAYO NGOKUCHONGA INTWANA ENCINCI UKUBA IDLALELE ISIZWE
Iqela lesizwe lebhola ekhatywayo eSpain linike ithuba umdlali osakhulayo noseze ngobuso elizweni lokuba adlalele eliqela. Lo mdlali nodlalela iqela lodumo elithandwayo nelaziwayo kwihlabathi iBarcelona utyunjwe ukuba abengomnye wabadlali abazakudlala namaqela amabini kwimidlalo yobuhlobo.
Lo mdlali ogama linguLamine Yamal uneminyaka elishumi elinesithandathu kuphela ubudala. ISpain sizakuqubisana neGeorgia kwakunye neCyprus kwimidlalo yobuhlobo ukulungiselela indebe yeEuro yonyaka ka2024. Lo mdlali ukuba udlalile ngethuba iSpain idlala neGeorgia ngolwesihlanu uyakuba ngumdlali wokuqala ukudlalela eli qela lesizwe eneminyaka elishumi elinesithandathu inyanga enye neentsuku ezingamashumi amabini anesithandathu. UYamal uyakube esophula irekhodi kaGavi naye odlalela iBarcelana nowathi waqala eneminyaka elishumi elinesixhenxe namashumi amathandathu anesibini entsuku ubudala ngethuba iSpain iqubisene neItaly ngenyanga yeDwarha ngonyaka ka2021.
ULamine uye wonyuselwa ukuba adlalele oxholovane beBarcelona ngethuba edlale kwimidlalo emibini edlulileyo yeSpanish laliga nalapho athe wazibonakalisa njengomdlali obalaseleyo nozimiseleyo nangethuba iBarcelona iqubisene neVillareal nalapho iphumelele ngamanqaku amane kwamathuthu nalapho athe wenza izinto zamehlo.
ISpain siqubisana neGeorgia ngolwesihlanu umhla wesibhozo kwinyanga yentwasahlobo ukutsho oko kwinyanga yoMsintsi iphinde idlale neCyprus ngomhla weshumi elinesibini ngolwesibini ezintsukwini kulenyanga imiyo.
Lo mdlali ebenalo nethuba lokudlalela iqela lesizwe laseMorroco nanjengoko eyinzalelwane yakhona.