Amapolisa aseGqeberha aphanda ityala lokuphanga ishishini emva kokuba abarhanelwa abahlanu bezigqume ubuso nababexhobile bephanga inkampani yonogada eMill Park Drive, eMill Park ngomhla weshumi elinesihlanu kuTshazimpuzi.
Ngokwengxelo ephuma kwisithethi samapolisa uKapteni Andre Beetge, uphango lweshishini lwenzeke ngentsimbi yeshumi elinanye (23:00) ngokuhlwa.
Uthe la madoda mahlanu awayezigqume ubuso nawayexhobile akwazi ukungena kule ndawo aze afuna ukungena kwigumbi lolawulo ekhombe ngemipu.
“Baye bangena kwisefu yemipu baza bathatha imipu elishumi elinesithathu (13) eluhlobo lwe-9mm, iimagazini ezilithoba, neembumbulu ezilikhulu namashumi amathathu anesihlanu (135),” utshilo uBeetge.
Uqhube wathi bathathe nelaptop enye noomakhelekhukwini abahlanu phambi kokuba bavalele aba basebenzi bathathu kwigumbi elikhuselekileyo baze bashiye indawo ngemoto yakwaVW Polo emhlophe.
UBeetge uthi akukho mntu wonzakeleyo ngethuba lesi sehlo kwaye akukabanjwa mntu okwangoku.
“Ityala lokuphanga ishishini livuliwe kwaye lisaphandwa ngabakwaSAPS Mount Road,” utshilo uBeetge.
By Siyakholwa Vuso