Owayesakuba yinkokeli yeDemocratic Alliance eMpuma Koloni kunye nokuba ngusodolophu weNelson Mandela Bay, uNqaba Bhanga ubuyele kumbutho weAfrican National Congress. Uziswe eluntwini njengelungu leANC ngoLwesine umhla wamashumi amabini anesithathu (23) kuCanzibe emva kokuqukumbela amaphepha afanelekileyo kundlunkulu wengingqi eNelson Mandela Bay.
I-DA yamgxotha uBhanga kweyoMnga ka-2023 ngenxa yokuphendula kumakhasi onxibelelwano apho wayegxeka usihlalo webhunga elihlangeneyo uHelen Zille, emtyhola ngokuba “ngoyena mntu unobuhlanga,” phakathi kwezinye izinto.
UBhanga uthi uzimisele ekwakhiweni ngokutsha kweANC kule ngingqi.
“Kufuneka kwenziwe umsebenzi eNelson Mandela Bay,” utshilo ngethuba ethetha noonondaba ngoLwesine.
“Ndifuna ukusebenzisana namatsha ntliziyo ukuzama ukwakha ngokutsha iNelson Mandela Bay ngenkqubo yokuvuselela iANC. Owayesakuba ngumongameli weANC Thabo Mbeki nabanye abantu abaqhubela phambili bebesithi, ‘masiyilungise le nto silungise intshukumo ngokuyihlaziya siqinisekise ukuba imingeni iANC ejongene nayo sinegalelo ekuyilungiseni.”