By Inga Mkalali.
Ozakhele udumo ngokudlala indawo kaAmo kwiYoungins ngomnye wabalinganiswa abayintloko kuchungechunge lo mdlalo omtsha, iNimba, nalapho adlala khona indawo kaQhawekazi Mabandla. UAyakha Ntunja oyinzalelwana yaseGqeberha kwiphondo leMpuma Kapa uzifake zatshona inzipho endimeni yokuba ngumdlali kwinkqubo zikamabonakude, nakwimidlalo yeqonga.
Kususela ebuncinaneni bakhe, uAyakha ebengumntwana odlamkileyo intshisakalo nothando lobugcisa analo limkhokhelele ekubeni amabanga wakhe aphezulu awenze kwisikolo iNational School of the Arts nalapho athe ephumelela ibanga leshumi elinesibini ngo2021 wabe sele ezenzele igama ngokugqama nokubalasela okuye kwamphathela amawonga nembasa eziquka iFEDA Acting Award.
Isakhono sakhe sokuba ngumlinganiswa usibonakalise kwimidlalo eliqela efana neYoungins, MTV Shuga, Ubizo Lakhe, NTASH, Pearls of Wisdom kunye naku Ke Bona Spoko .
“Into eye yabalasela ngokudlala uQhawekazi kukuba ndifumene ithuba lokunxibelelana nzulu nababukeli ngokwemvakalelo kwaye ndibabalisele ibali likaQhawe ngokunyanisekileyo. Ababukeli mabasoloko bethe gqolo ukubeka amehlo kulo mdlalo ngoba bangafunda banzi ngokutyeba kwenkcubeko yesiXhosa, ngenguqu kumakhaya kwakunye nemiba esijongana nayo singabantu futhi sifunde inkalo esinothi siyivelele ngazo imicimbi ebumila kunje.”
Imicelimngeni athe waqobisana nayo uAyakha ibi kukucacelwa nokuqonda imicimbi yenkcubeko kwakunye nokuhambisa ubunzulu bemvakalelo zomlinganiswa amdlalayo ngokunyanisekileyo kwaye uqhube wathi akukhonto anokuyitshintsha kuQhawe kuba unyanisekile kwaye uyakonwabela ukuba ngotyunjiweyo ukubalisa ibali lalo mlinganiswa unguQhawe.
“Umnqweno wam kudlala abalinganiswa abohlukeneyo nabane mvelaphi ezingafaniyo nokuvelisa imixholo engabaliswayo okanye ndibengumbhali”.
Amazwi enkuthazo akhe kubabukeli athi “Uze ungazishenxeli ingcambu nemvelaphi yakho, ume uqine ulandele amaphupha neminqweno yakho kwaye uze ubengumlumiso onempembelelo ezintle apho uhlala khona nakuluntu lonke luphela”.