By Nyameka Lamani.
Ngelikhumbula, lihlonipha uTata uNelson Mandela ngalenyanga yokuzalwa kwakhe, uSodolophu woMaspala iDr AB Xuma ohloniphekileyo uCeba uSiyabulela Zangqa ephahlwe lisebe langaphakathi likaVezamafa (Corporate Services Department) neSebe lezophuhliso (Department of Social Development) batyelele iziko labantu abadala ngomhla wamashumi amabini anesibhozo (28) kweyeKhala, iSibanye Older Persons Centre kwilali yase Sundwana eSitholeni, kwa Ward 13.
Bekhokhelwe ngumxholo wabo othi “Yenza onako, ngonako, apho ukhoyo” eligqiza lithathe inxaxheba kutyalo mifuno (Iminqatha, ikhaphetshu, iitapile nezinye) ngeliphuhlisa ukuzimela nokuziphilisa,
njengenxalenye yokuzinikela kukaMasipala kuluntu nokuzondla, uyaqhubeka nokuphakamisa uphuhliso ngolimo.
Eli qela lichithe usuku begudlana ngamagxalaba nezinkonde neenkondekazi bebancoma ngegalelo labo kwintlalo yoluntu. Kuye kwabelwana nangesidlo esimnandi sinezakhamzimba sasemini.
Eli ziko labantu abadala lasekwa ngonyaka ka-2017, linamalungu angamashumi amabini anesithathu (23) abaqhubayo kumsebenzi wezandla, uhlohlontsimbi nophuhliso zakhono.