Umbutho woMkhonto weSizwe (MK) uthi owayesakuba nguMongameli, uJacob Zuma, wavalelwa yiNkundla yoMgaqo-siseko ngaphandle kokunikwa ilungelo lakhe lomgaqo-siseko lokuxoxwa kwetyala lakhe ngokukhululekileyo nangobulungisa.
Oku kuvele ngethuba umbutho weMK ubhekisa kwinkundla yolonyulo ukucela umngeni kwisigqibo seKomishoni eZimeleyo yoNyulo (IEC) esithintela uZuma ukuba angenele isikhundla sikarhulumente. Umbutho kwinyanga ephelileyo waxelelwa ukuba owayesakuba nguMongameli akanakuvela kuluhlu lwabagqatswa beqela leMK ngenxa yokudelela kwakhe isigwebo senkundla.
UMgaqo-siseko uthi nawuphi na umntu othe wabanjelwa ukwaphula umthetho waza wagwetywa ngaphezulu kweenyanga ezilishumi elinesibini (-12) entolongweni ngaphandle kokukhetha isohlwayo uyathintelwa ekubeni amele isikhundla sikarhulumente. Kananjalo uZuma wafunyanwa enetyala lokudelela inkundla ngo-2021 ngokusilela ukuvela phambi kwekomishoni kaZondo eyayiphanda ngezityholo zokubanjwa ngobhongwana kukarhulumente ngamashishini abucala.
Nangona kunjalo iqela le-MK lixoxa ngelithi ezi nkqubo zinokuchazwa kuphela njengeenkqubo zoluntu ezibize nje isohlwayo solwaphulo-mthetho esisigwebo seenyanga ezilishumi elinesihlanu (-15).
Isithethi sombutho uNhlamulo Ndlela uthi, “UMongameli Zuma wavalelwa emva kwento eyakuba liCandelo lamashumi amathathu anesihlanu (Section 35) loMgaqo-siseko, apho ubufanele ukuma phambi kwejaji kwaye kube nokuxoxwa kwetyala ngobulungisa.”
“UMongameli Zuma wavalelwa yinkundla yomgaqo-siseko engakhange anikwe ilungelo lakhe elikumgaqo-siseko lokuxoxwa kwetyala lakhe simahla, ngoko ke asinakuyichaza njengetyala lolwaphulo-mthetho. Konke akwenzileyo kukudelela inkundla kwaye ayilotyala lolwaphulo-mthetho elo. Ingumcimbi wembambano kwaye uMthetho we-IEC ubhekisa kumcimbi wolwaphulo-mthetho,” utshilo uNdlela.