By Esona Magawana
Amapolisa aseRhawutini akhangela abarhanelwa ababini abadubule babulala amapolisa amabini eIvory Park, eRhawutini, ngorhatya lwangoLwesihlanu.
UMkomishinala wamaPolisa kuzwelonke uFannie Masemola uyalele uMkomishinala wePhondo uTommy Mthombeni ukuba andise zonke izixhobo zokusebenza ngeenzame zokukhangela abenzi bobubi.
Uhlaselo olu lwenzeke ngorhatya lwangoLwesihlanu ngelixa uSajini kunye noConstable babegade indawo yase-Ivory Park. Iingxelo zamapolisa zibonakalisa ukuba la mapolisa mabini ahlaselwe ngabantu ababini abangaziwayo abafike badubula ze babulala la mapolisa, bethatha imipu kunye neeselfowuni zawo.
UMkomishinala waseRhawutini uTommy Mthombeni uqinisekisile ukuthunyelwa kweqela labacuphi abakhethekileyo kulo mmandla ngenjongo yokufumana abarhanelwa kunye nokuqinisekisa ukufunyanwa kwemipu karhulumente.
UMkomishinala wamaPolisa kuzwelonke uFannie Masemola ukugxeke kabukhali ukubulawa kwamagosa ogcino-mthetho kwaye ubalule imeko ebanzi yobundlobongela obujoliswe kumagosa, esithi phakathi kuka-Epreli noSeptemba walo nyaka, amagosa amathandathu abulawa esemsebenzini kwiphondo liphela.