By Asemahle Mbete.
NgoLwesine, uMphathiswa weMfundo esiSiseko uSiviwe Gwarube, ekunye noMphathiswa wezoNxibelelwano kunye neDigital Technologies uSolly Malatsi, batyelele isikolo esikwinqanaba lesihlanu (5) ngeenjongo zokunikezela ngeetablet zokufunda ezisemgangathweni.
Abafundi beSikolo iGlenvista eRhawutini ngoku baza kufunda ngobuxhakaxhaka bedijithali kulandela ukunikezelwa kwee-smart tablets esikolweni.
NgoLwesine, umhla wamashumi amathathu ananye (31) kweyeKhala 2025, uMphathiswa weMfundo esiSiseko uSiviwe Gwarube, ekunye noMphathiswa wezoNxibelelwano kunye neDigital Technologies uSolly Malatsi, batyelele isikolo esikwinqanaba lentlupheko ngeenjongo zokunikezela ngeetablet zokufunda.
Lo mnikelo wenzeke ngenxa yobuhlakani becandelo labucala, uyinxalenye yelinge elibanzi likarhulumente lokuqhuba ukufakwa kwedijithali ezikolweni.
Ethetha nabafundi nabasebenzi, uGwarube ugxininise indima yobuxhakaxhaka balemihla ekuphuculeni iziphumo zemfundo nasekuguquleni indlela abantwana abafunda ngayo.
Kwintetho yakhe, uGwarube ugxininise ukubaluleka kwekamva lemfundo esisiseko elele ekukwazini ukulungiselela abantwana kwihlabathi eliguqukayo ngokuvala umsantsa wemithombo kunye nokukhawulezisa inguqu yedijithali ezikolweni.
UMalatsi uphinde waqinisekisa ukuzinikela kwesebe kuqhagamshelo lwezikolo kunye neziseko zophuhliso zedijithali.
La masebe kulindeleke ukuba anikezele ngeetablet ezingakumbi kwiphondo laseFreyistata, eNtshona Koloni naseMpuma Koloni njengenxalenye yeenzame zokomeleza unxibelelwano ezikolweni nokwakha iziseko zedijithali ezifunekayo ukuqinisekisa ukuba wonke umntwana uya kuphumelela kuqoqosho lwedijithali.