By Esona Magawana.
INkundla yeNgingqi yaseMonti igwebe amadoda amabini ngokubulala ngenkohlakalo uYolanda Ntonto oneminyaka engamashumi amabini anesithandathu (26), umzimba wakhe wafunyanwa ulahlwe kwisiza eSouthernwood, KweyeNkanga 2022.
INkundla iye yagweba uVuyo Rambo Mbulana oneminyaka engamashumi amane anesithathu (43) ubomi entolongweni kunye noAsithandile Ntlanjeni oneminyaka engamashumi amathathu anesihlanu (35) iminyaka engamashumi amabini anesihlanu (25) emva kwesigwebo sabo sokubulala.
Esi siganeko senzeka ngomhla wokuqala (1) KweyeNkanga 2022 eDuncan Village, eMonti. Ngelo xesha, umfi wayengumqeshi ehlala kwityotyombe elingasemva kweyadi yakwaMbulana. Emva kokuba iiteki zikaMbulana zilahlekile, kutyholwa ukuba umntwana wasekuhlaleni wamxelela ukuba uNtonto uzithathile iiteki. Ngaloo mini uMbulana noNtlanjeni badibana noNtonto ehamba nesithandwa sakhe bamcela ukuba abuyele endlini ukuze baxoxe ngalo mcimbi. UNtonto uye wathobela, ngelixa intombi yakhe ilindile kwityotyombe lakhe.
Ngaphakathi kwindlu enkulu, kwavuka ingxabano. UNtlanjeni waba ngowokuqala ukukhupha imela wahlaba uNtonto ongaxhobanga, kathathu. UMbulana emva koko wakhupha imela yakhe wamhlaba izihlandlo ezingamashumi amane anesixhenxe (47). Emva koko, uMbulana wafumana isithuthi, wazenza ngathi uthutha inkomo exheliweyo. Yena noNtlanjeni basonga umzimba ngeplastiki neshiti, bawuthutha, bayowulahla, eSouthernwood.
Igosa lezendlela elijikelezayo lawubhaqa lo mzimba ngentsasa elandelayo, umhla wesibini (02) KweyeNkanga 2022. UNtonto akazange achazwe kugcino-zidumbu likarhulumente de umama wakhe waxela ukuba ulahlekile.
ITyala lahlala lingekasonjululwa de kwangomhla wamashumi amabini anesithandathu (26) kweyoMdumba 2023, ngethuba uMbulana ezinikela emapoliseni ngokuzithandela, exelela umama wakhe ukuba ebephupha ngokumphazamisa. UNtlanjeni wabanjwa ngomhla wamashumi amabini anesithoba (29) kweyeThupha ngo2023.
Bobabini abatyholwa baliphika ityala. UMbulana wachaza ukuba kwenzeka ntoni kodwa wathi akayenzanga yedwa. UNtlanjeni ukukhanyele kwaphela ukubandakanyeka. Nangona kunjalo, ubungqina, kuquka nobentombi kaMbulana, owazibonela ukuhlaselwa, babeka omabini la madoda kwindawo yexhwayelo.
Ngethuba ewisa isigwebo, umtshutshisi obambeleyo kwinkundla yenqila uSinovuyo Sotomela ufune isigwebo esiqatha, echaza ubundlavini obungenangqiqo, ukulahlwa komzimba ngokungenalusini, kunye nento yokuba ulwaphulo-mthetho lwenziwe ngenjongo yokufezekisa injongo enye.
INkundla iye yagweba uNtlanjeni iminyaka engamashumi amabini anesihlanu (25), yamjonga njengesaphuli-mthetho sokuqala ebomini bakhe. Nangona kunjalo, inkundla ayizange ifumane zizathu zokuphambuka kwisigwebo sobomi kwityala likaMbulana, njengoko wayegwetywe enetyala ngaphambili.
Omabini la madoda abhengezwe njengokungafanelanga ukuba nemipu.
Esamkela iziphumo, uMlawuli wezoTshutshiso eMpuma Koloni uMnumzana Barry Madolo uncome igosa eliphandayo kunye neqela lezotshutshiso ngokukhuthala kwabo nokuzinikela ekuqinisekiseni ukuba ubulungisa buyenziwa. INPA ihleli iqinile kwinjongo yayo yokubamba abenzi bolwaphulo-mthetho olunobundlobongela baphendule.