Ngabantu abalithoba(9) ababhubhe kwingozi emasikizi nebibandakanya izithuthi ezimbini(2) zohlobo lweteksi. Lengozi yenzeke kuhola wendlela uN2 phakathi kwaseMakhanda neNanaga kubusuku bayizolo.
Ngokwengxelo yesebe lezothutho ePhondweni, enye yeziteksi ibigcwele ngabakhweli kwaye isingise eGqeberha ngethuba ingqubana nenye ebisiya kwicala elohlukileyo inabakhweli ababini nekurhaneleka ukuba ngumyeni nomkakhe.
Ukanti esi sibini kuvakala ukuba sibhubhe kulengozi kunye nabanye abasixhenxe(7) nabebekhwele kwesinye isithuthi. Kukwavakala ukuba enye yezi Quantum ibisuka eGqeberha isiya eMthatha inabantu ababini logama enye ibisuka kuTsolo isiya eMosselbay igcwele.
Ngabantu abadala ababhinqileyo abathathu(3), amadoda amane(4) kunye nabantwana amabini(2) abaphakathi konyaka omnye(1) ukuya kwemine(4) abathe babhubha kulengozi.
Umphathiswa wesebe lezothutho kweliphondo uWeziwe Tikana-Gxotiwe udlulise amazwi ovelwano kwiintsapho eziswelekelweyo kwezingozi nesele zithathe imiphefumlo yabantu abaninzi kweli phondo ingakumbi kwezi holide zehlobo.
Abonzakeleyo babalekiselwe esibhedlele saseMakhanda ukuze bafumane unyango.
Idokethi lokubulala ngokungenanjongo livuliwe ngamapolisa.